L’Omett del dodes
Quest l’era on personagg milanes ch’el stava de cà in via dell’Aniteatro al n.12, cà ormai trada giò, perché n’hann faa sù voeuna pussee moderna, in del quartier che ona vòlta el se ciamava “el Guast”.
L’era ciamaa el Mago de Cors Garibaldi ò l’ “Omett del dodes” .
L’era on pover diavol, on poo strapelaa ma restaa in del coeur di milanes per i sò pastrugnad, che eren da tutti consideraa on medicament special, ona porzion magica e perina miracolosa bòna de fà passà tutti i mai: dai dolor reumatich, a la toss, dal mal de cai, a quell di dent, dal mal de cô, al mal de stomegh.
Sto mes’ciòss color gialdin ch’el pareva la còlla de legnamee, l’era ciamaa l‘ “Unguent del dodes” e lù le vendeva saraa dent in d’ona scatoletta de tòlla piscinina.
Foeura de la soa cà gh’era de spess ona ilera de person che spettava de andà dent in del stanzon dove lù settaa sora a ona sgangherada poltrona de velluu ross, dedree a on tavolon, pien de bottigliett, tolett, scartafazz, annotazion, cattanaj vari, el vendeva minga pussee d’on scatoletta per persona al dì.
Quand ghe n’aveva pù, l’andava a la inestra e ai person che eren lì sòtta in attesa de andà dent, el ghe diseva de tornà el dì dòpo ò fra on para de dì, perché la produzion per quell dì lì l’era finida e per trà insema la preparazion del magich unguent ghe voreva el sò temp.
El doveva misurà cont on misurin de precision i vari component, fai bui in d’ona gran pignatta ch’el gh’aveva semper pronta in sul foeugh del camin,
poeu stravaccaa el paston in d’ona squella per fall vegnì fregg e ultima operazion cont on cazzuu mettel dent in di scatolett pront in filera sora a ona mensola quattada da on strasc che ona vòlta l’era nett, adess el pareva quell del moletta.
On dì in de l’òrt che gh’era dedree de la soa cà, el ved ona vesina che l’è adree a lavà in d’ona sidella on gatt e el ghe dis:
- Sciora, la varda che lavà i gatt malaa voeur dì fai morì, che le vonciscia cont el mè unguent e la vedarà ch’el guarirà…
- Lù ch’el se interessa di sò affari, curioson!
Dopo on para d’or el slonga on’oggiada da la finestra e el ved che la vesina la piang cont in brascia el gatt mòrt.
- L’ha vist…ghe l’avevi dii mi…. la doveva minga lavall.
- Ma l’è mòrt minga perché l’hoo lavaa, ma perché l’hoo faa passà in del tòrc!
I autorità del Comun l’aveven difidaa de daghen on taj a sta attività, ma lù in considerazion de la gran domanda, l’era andaa innanz fin che on dì i sò client hann trovaa l’uss de legn, per mej dì el porton saraa sù per semper.
El Mago de Cors Garibaldi, a 90 ann, l’ aveva dismiss de preparà el sò “Unguent del dodes” e l’era sgorà in ciel dove, forsi, l’avarà tentà de reilaghel anca ai angiol.
Là in mezz ai nivol el sera portaa via el segret per la composizion de sto mes’ciòss, perché mai a nissuna persona l’aveva svelaa s’el ghe metteva dent in de sto unguent miracolos, inscì ricercaa dai Milanes quand gh’aveven ona quai malann.
GLOSSARIO
strapelaa = malridotto
pastrugnad = intrugli
legnamee = falegname
sgangherada = sgangherata, rotta
scartafazz = cartacce
squella = scodella
moletta = arrotino
vonciscià = ungere
tòrc = torchio
daghen on taj = smettere
sgorà = volare
reilaghel = appiopparlo