I nümer al lott, se ghe manca?
..
Pö disen che che quej che cumanda capissen nagott!!
Pröva a ndà vers Mülassan, te incuntrett la rutunda de la Pandina lì a Casalmaiocch, fermess un cicininn perchè mèrita; hu fa na foto per spiegamm mej e fa vedè che inteligensa che g’han i noster martur che sistèmen i noster strad e quej che cuntrolen e quej che duarien cuntrulà quej che cuntròla.
Se guardì in gir l’è no facil truà cartej cunt la distansa chilometrica, fursi ghe sarà un mutiv, sü la via Emilia, ad esempi, han mis i nòmm, ma di chilometer nanca l’umbra.
Lì, sü la rutunda inveci a gh’in, guardì che bèla storia, el cartèl che gh’è in diressiun de Meregnan el mustra Lodi dudes chilometer, Mülassan tri.
Alura guarda püssè in la, des meter, minga püsssee, el cartèl che gh’è in diressiun de Sordi el mustra Lodi vòt chilometer, Mülassan dü.
Sòta hu mis i futografij per fa vedè.
Adèss, capissi che quej che pianta i cartèj g’han no de savè quant’hin lungh quater chilometer e pöden anca pensà che quel toc de rutunda el sia lung assèe per fa i quater chilometer de diferensa, ma crèdi che i cartej i pianten no inscì de per lur, credi no che vaghen al deposit, ciapen sü quater cartej sensa vardà e dopu van in gir e pienten giò el prim che capita, ghe sarà un quaj vün che ghe dis ndue g’han de piantà cus’è, e quèl quaj vün duaria cuntrulà se i omen fan quel che lü ghe dis de fa, ma mi me sembra che una roba inscì l’abien fada quan seren ciuch, quej c’han pientà i cartej, quej che dueven cuntrulà e parlum no di alter, tüti i grand’omen che passen de lì quarden i cartej e disen nagott, perché un quaj asesur, o sindegh o ingegner de lì l’è pasà per forsa.
Ma ndèm avanti inscì a fass rid a drè de tüti quèj che riva in di noster part, dan un ugiada ai cartej e capissen sübit me la va di noster part.
E adèss vören met insèma la tangensial, e chi l’è che l’ha stüdiada?
Chi l’è che duarà trala in pè ?
Fursi propi anca quej c’han fa pientà giò quej cartej lì, sèm a post!!!!
Traduzione in lingua italiana
(per gli stranieri) Cosa dobbiamo fare...