EL SERPENT DEL MOSÈ
Edoardo Bossi
Mosè el ven regordaa a Milan cont ona statoa che se troeuva in la cort de l’Arcivescovaa insèma a quèlla del fradèll Aronne. Ma in ona forma indirètta, i milanes el regorden anca in Sant Ambroeus. De fatt, quand se va denter in Sant Ambroeus e se guarda l’altar, in su la sinistra gh’è ona colònna e in cima gh’è el famos “Serpent del Mosè” che da pussee de milla ann el se po’ rimirà. La tradizion la voeur ch’el serpent de bronz el sia rivaa a Milan in del 1002, portaa dal vèscov Arnolfo II quand l’era tornaa da Costantinopoli, doe l’era andaa per cunt de l’Imperador Ottone III per domandà la man de Stefania, la tosa de l’Imperador d’Orient. Quèst, l’ha nò domà concèss la man de la principèssa (che l’era dree a vegnì in Italia insèma al Vèscov) ma l’ha caregaa el pòr Arnolfo de tanti regai de consegnà a l’Ottone III. Tra i tanti regai costos, gh’era anca on serpent de bronz che second la tradizion l’era staa forgiaa dal Mosè. Miss in scima a ’na colònna d’avanti a l’accampament di ebrèi, el difendeva el pòpol d’Israèl dai serpent velenos del desèrt. Ma intanta che l’Arnolf l’è adree a fà el viagg per tornà indree, el ven a savè che l’Imperador Ottone III l’è mòrt, de manera che la pricipèssa Stefania
l’è tornada a Costantinopoli e el Vèscov l’è tornaa a Milan cont el prezios serpent. Quand l’Arnolf II l’è rivaa a Milan, i milanes hann miss el serpent in su ’na colònna, quèlla che se po’ vedè anmò al dì d’incoeu.
Col temp, el serpent l’è diventaa on simbol de venerazion per i milanes che l’hann semper consideraa el miglior, fra tutti i rimedi, contra i dolor de venter e in particolar l’era veneraa dai mamm ambrosian che per tanti sècol hann portaa i sò bagai a toccà la colònna miracolosa che la liberava dai vèrmen. On quaivun el va ancamò incoeu.